Ginkwestyon sang isa ka environmental activist ang posible nga epekto sang Pax Silica Project sa tubig, kuryente kag pangabuhi sang komunidad.
Sa interview sang Bombo Radyo Koronadal kay Lexi Acosta, isa ka environmental activist, iya ginpahayag ang dako nga kinahanglanon sa tubig kag kuryente sang mga pasilidad nga ginakabit sa proyekto, ilabi na ang data centers.
Suno sa iya, mahimo ini magdugang sang pressure sa groundwater kag power supply kag magkompetensya sa resources sang mga komunidad.
Ginkabalak-an man ni Acosta ang kakulangan sang transparency bangud naglain-lain ang mga pahayag bahin sa mga component sang proyekto.
Suno sa iya, ang amo nga inconsistencies mahimo magdugang sa pagduhaduha sang publiko.
Ginkwestyon man niya ang ginapromisa nga sobra 100,000 ka trabaho, bangoud posible nga temporaryo lamang ang iban kag nakasentro sa construction ukon assembly.
Ginpahayag ni Acosta nga indi siya kontra sa teknolohiya ukon progreso, apang dapat anay ma-assess sang insakto ang long-term effects sang proyekto kag masiguro ang water security, energy supply, transparency kag proteksyon sa palibot antes ini ipatuman.
