Ginpalawig ni Senator Loren Legarda ang iya medical leave tubtob Agosto 19, suno kay Senate Secretary Renato Bantug sang Lunes.
Suno kay Bantug, nakabaton ang Senate Secretariat sang sulat halin sa opisina ni Legarda sang Lunes sang aga nga nagapahayag nga magapabilin anay sa leave ang senador.
Halin sang Agosto 3, wala na nagatambong si Legarda sa mga session sang Senado kag sa impeachment trial ni Vice President Sara Duterte.
Una siya nag-file sang medical leave halin Agosto 3 tubtob 5 kag Agosto 11 tubtob 12.
Napa-report man nga naghalin sa pungsod si Legarda sang Agosto 2 kag nagbyahe padul-ong sa France.
Samtang, nagdungan ang iya indi pagtambong sa preliminary investigation sang Office of the Ombudsman sa mga reklamo nga plunder kag graft batok sa iya kag sa iya anak nga si Batangas Representative Leandro Leviste.
Suno sa Ombudsman, gin-akusahan si Legarda nga gingamit ang iya posisyon agud makakuha sang eksklusibo nga solar power franchises para kay Leviste, nga ginapahayag nagresulta sa bilyun-bilyon nga piso nga “ghost electricity” losses.
Ginpanginwala ni Legarda ang mga akusasyon kag gintawag ini nga “utterly false and baseless.”
Ginpangabay man niya ang publiko nga indi pagbutangan sang political narrative ang iya pagliban.
Wala ginpahayag ni Legarda ukon sang iya talatapan kun ano ang iya balatian ukon medical condition nga rason sang iya leave.
