Ginpatuman sang Philippine Atmospheric, Geophysical and Astronomical Services Administration (PAGASA) ang Yellow Rainfall Warning sa Zambales kag pila ka lugar sa Bataan bangud sa padayon nga pag-ulan.
Suno sa Heavy Rainfall Advisory, posible maeksperyensyahan ang pagbaha sa mga lugar nga masami mabahaan sa Zambales.
Posible man ang pagbaha sa Dinalupihan, Abucay, Samal, Orani, Hermosa kag Morong sa Bataan.
Sa masunod nga tatlo ka oras, ginapaabot ang hinay tubtob kasarangan nga ulan nga may mabaskog nga pag-ulan sa Laguna kag pila ka bahin sang Quezon.
Lakip sa mga lugar nga apektado ang General Nakar, Dolores, Candelaria, Tiaong, San Antonio, Sariaya, Real kag Infanta.
Padayon man nga ginapaabot ang pag-ulan sa Tarlac, Pampanga, Nueva Ecija, Bulacan kag Metro Manila.
Apektado man sang pag-ulan ang pila ka bahin sang Bataan, Batangas, Cavite kag Rizal.
Suno sa PAGASA, mahimo magpadayon ang pag-ulan kag mabatyagan sa mga kalapit nga lugar sa sulod sang tatlo ka oras.
Bangud sa malain nga panahon, may pila ka lugar nga nagsuspinde sang klase sini nga Lunes, Agosto 17.
