Nagpaandam si Senate impeachment presiding officer Chiz Escudero nga magpagwa siya sang ruling sa Lunes, Agosto 17, may kaangtanan sa mga social media posts sang mga abogado nga nagapakigbahin sa impeachment trial ni Vice President Sara Duterte.
Ini matapos ginpatuhoy ni lead defense counsel Sheila Sison ang isa ka social media post ni private prosecutor Amando Virgil Ligutan nga gin-angot niya sa isa ka pagbayluhanay sang prosecution kag defense samtang nagapadayon ang hearing.
Suno kay Sison, indi angay nga magkomento sa social media ang mga counsel samtang nagapadayon ang impeachment proceedings, kag ginpatuhoy niya ang Rule 18 sang impeachment rules.
Suno naman kay Escudero, ginpangabay na niya ang clerk of court nga bantayan ang public statements sang mga counsel sa nagligad nga semana, kag may isa ka bahin nga suno sa iya, “naglapaw sa linya” sang madamo na ka beses.
Ginpahayag ni Escudero nga iya ipagwa sa Lunes ang warning kag posible nga direktiba may kaangtanan sa sini nga mga pahayag agud mapabilin ang decorum sa impeachment court.
Samtang, hatagan man sang kahigayunan si Atty. Amando Virgil Ligutan nga mahatag ang iya panig sa isyu sa sunod nga hearing.
