Nagpanaog sa ika-39 nga puwesto ang Gilas Pilipinas sa pinakabag-o nga FIBA Men’s World Ranking matapos ang third window sang FIBA Basketball World Cup Qualifiers sang Hulyo.
Humalin sa una nga ika-36 nga puwesto, nagnubo sang tatlo ka ranggo ang Gilas kasunod sang ila 106-102 nga double-overtime nga kapierdehan batok sa New Zealand kag 92-49 nga kapierdehan batok Australia sang nagligad nga mga semana.
Bisan sang pagnubo sa world rankings, nagpabilin ang Gilas sa ika-pito nga puwesto sa Asia, nga ginapangunahan sang Australia.
Indi lang ang Gilas ang nakaeksperyensya sang pagnubo sa rankings bangud ang Australia nagpanaug man halin sa ika-pito pakadto sa ika-walo sa kalibutan, samtang ang Kuwait nagnubo halin sa ika-109 pakadto sa ika-118, kag ang South Africa halin sa ika-110 pakadto sa ika-119 nga puwesto.
Ginapaabot nga mahimo magbag-o liwat ang ranggo sang Gilas Pilipinas pagkatapos sang ila madason nga mga hampang kontra Jordan sa Agosto 28 kag Iran sa Agosto 30.
