Ginalauman sang Armed Forces of the Philippines (AFP) nga mas madamo pa nga mga Pilipino ang makabisita sa Pag-asa Island sa West Philippine Sea.
Suno kay AFP Spokesperson Col. Francel Margareth Padilla, luyag sang AFP nga makita sang publiko ang katahom kag mga kinaiya sang isla, bisan pa isa ini sa pinakamalayo nga mga isla sa ginaawayan nga kadagatan.
Sang nagligad nga mga adlaw, gindala sang AFP ang pila ka military kag civilian content creators sa Pag-asa Island agud ipakita ang mga proyekto sang Sandatahang Lakas sang Pilipinas, lakip ang pagtukod sang mga imprastraktura, pagpalig-on sang government facilities, pagbulig sa mga residente, kag pagpanalipod sa mga isla sa West Philippine Sea.
Dugang ni Padilla, importante nga mahibaluan sang mga Pilipino nga ang Pag-asa Island isa ka bahin sang teritoryo sang Pilipinas kag indi ini pagbayaan sang gobyerno.
Nagalaum man ang AFP nga mas madamo ang interesado nga magkadto sa isla bangud padayon nga ginapauswag ang transportasyon halin sa mga pantalan kag paliparan sa mainland Palawan.
