Naglunsyar ang Estados Unidos sang bag-ong serye sang airstrikes batok sa Iran matapos gin-alegar nga gin-atake sang Iranian forces ang isa ka barko nga nagalabay sa Strait of Hormuz.
Bilang sabat, gin-anunsyo sang Islamic Revolutionary Guard Corps (IRGC) nga sirado anay ang Strait of Hormuz tubtob sa wala pa sang bag-ong pahayag kag naglunsyar sang mga missile kag drone attacks batok sa mga base militar sang US kag mga kaalyado sini sa rehiyon, lakip ang Jordan, United Arab Emirates, Qatar, Kuwait kag Bahrain.
Suno sa US Central Command, gin-atake sang Iran ang isa ka Cyprus-flagged commercial vessel nga nagresulta sa dako nga halit sa barko kag isa ka tripulante ang ginakabig nga missing.
Bilang balos, ginpahayag sang US nga ginbomba sini ang 140 ka military targets sa Iran, lakip ang missile kag drone sites, communication networks kag coastal surveillance facilities.
Nagsaka man ang tensyon sa rehiyon bangud sang nagapadayon nga komprontasyon, samtang nagapadayon man ang mga paninguha sang mga tigpatunga agud mapabalik ang negosasyon sa tunga sang Estados Unidos kag Iran.
