Naghingyo sa Korte Suprema ang mga pamilya sang mga napatay sa war on drugs sang nagligad nga administrasyon nga ideklarar nga paglapas sa Konstitusyon ang mga polisiya nga ginbasehan sang kampanya kontra iligal nga droga.
Paagi sa ila mga abogado halin sa CenterLaw Philippines, nagsumite ang mga petitioner sang Manifestation and Urgent Motion for Resolution agud mapadasig ang pagresolbar sang mga kaso nga pending pa sa Korte Suprema halin pa sang 2017.
Lakip sa petisyon ang 26 ka mga komunidad sa Manila nga nagapahayag nga nakaagom sang pagpangharas sa kasagsagan sang war on drugs.
Ginhingyo man nila ang Korte Suprema nga ideklarar nga naglapas sa Konstitusyon ang Philippine National Police Command Memorandum Circular 16-2016 ukon Project Double Barrel, nga nangin basehan sang mga anti-drug operations.
Suno sa mga petitioner, yara pa gihapon sa implementasyon ang amo nga polisiya kag posible nga magamit liwat sa mga operasyon sa mga komunidad.
Gani, nagapangayo man sila sang writ of amparo bangud sa ginapahayag nga padayon nga pagpamahog, pagpanghadlok kag paglapta sang sala nga impormasyon batok sa pila ka pamilya sang mga biktima.
Madumduman nga sang Marso 2025, gin-arestar si anay Presidente Rodrigo Duterte paagi sa warrant nga ginpagwa sang International Criminal Court may kaangtanan sa kaso nga crimes against humanity kag gindala sa The Hague, Netherlands para atubangon ang paglilitis.
