Padayon ang pagtipon sang Iglesia Ni Cristo (INC) sa Liwasang Bonifacio sa Manila subong nga Huwebes, Hulyo 2, matapos ginbawi sang Quezon City government ang extension sang permit para sa ila nga programa sa EDSA-White Plains.
Natapos ang nauna nga programa sang Miyerkules alas-8:00 sang gab-i, suno sa permit nga una nga ginhatag sang lokal nga panguluhan sang Quezon City.
Antes naghalin ang mga nagtambong, gin-agda sila sang mga opisyal sang INC nga limpyuhan ang lugar kag dal-on ang ila mga basura.
Suno sa isa ka ministro sang INC, ginbalhin ang ila pagtipon sa Liwasang Bonifacio bangud indi na kinahanglan ang permit agud makapanginmatyag sang programa sa amo nga lugar.
Ginpahayag niya nga ang pagbalhin may katuyuan nga mapadayon ang paggamit sang ila katungod sa malaya nga pagpahayag sang ila mga panindugan.
Bilang preparasyon, nagpahayag si National Capital Region Police Office (NCRPO) chief Police Major General Anthony Aberin nga magapakatap sila sang inisyal nga 1,000 ka pulis sa Liwasang Bonifacio agud masiguro ang seguridad sang mga nagatambong kag sang publiko.
Dugang pa niya, mahimo pa gid nga madugangan ang kadamuon sang mga pulis depende sa ihap sang mga partisipante sa pagtipon.
Nagpangayo man ang NCRPO sang dugang nga pwersa halin sa iban pa nga mga yunit sang kapulisan kag nagapreparar man sa pagbutang sang mas madamo nga CCTV cameras sa palibot sang lugar.
Padayon man nga yara sa full alert status ang kapulisan, lakip na ang mga personnel nga na-deploy sa palibot sang Malacañang.
