Patay ang indi magnubo sa anum ka tawo matapos nagluntad ang sunog sa isa ka 10-palapag nga apartment building sa siyudad sang Antwerp, Belgium, sang Miyerkules sang aga.
Suno sa mga otoridad, ginabana-bana nga yara sa 200 ka tawo ang nagapuyo sa nasambit nga edipisyo. Gilayon nga nagresponde ang mga bombero, kapulisan, kag iban pa nga emergency responders agud luwason ang mga residente nga naipit sa sulod sang bilding.
Ginsugid sang pila ka mga nakaluwas nga antes nagtunog ang fire alarm, una anay nga nagbrownout sa edipisyo. Apang pagkaligad lamang sang pila ka minuto, naglapta ang mabaga nga aso sa mga pasilyo, gani wala na sila nakapanaog paagi sa hagdanan.
Bangud sini, napilitan ang mga residente nga magpabilin sa sulod sang ila mga apartment kag maghulat sang bulig.
Gumamit ang mga bombero sang fire ladder kag mga lubid agud maluwas ang mga residente nga naipit sa matataas nga andana kag sa mga balkonahe sang bilding.
Nagpanawagan man ang mga otoridad sa mga nagapuyo sa mga kalapit nga lugar nga sirad-an ang ila mga puwerta kag bintana agud malikawan ang paglanghap sang aso halin sa sunog.
Samtang, nagpahayag sang pagpakig-unong sa kasubo si Belgian Prime Minister Bart De Wever sa mga pamilya sang mga napatay kag sa tanan nga naapektuhan sang insidente.
