Ginpahayag ni Senate President Sherwin Gatchalian ang iya pagpamatok sa mga panawagan nga ipaubos ang age of criminal responsibility kasunod sang maduguon nga pagpamusil sa isa ka pampubliko nga eskwelahan sa Tacloban City nga nagresulta sa pagkapatay sang tatlo ka estudyante kag pagkapiang sang 15 pa ka iban.
Suno kay Gatchalian, wala sang kinahanglan bag-uhon sa Juvenile Justice and Welfare Act, bangud nagatuo siya nga ang mga menor-de-edad nga nalalambot sa krimen may yara pa sang kahigayunan nga magbag-o paagi sa husto nga paggiya, edukasyon kag rehabilitasyon sa mga pasilidad sang Bahay Pag-asa.
Ginpunto man sang Senate President nga posible nga may impluwensya ang marahas nga online games kag iban nga digital content sa pamatasan sang mga menor-de-edad nga nalakip sa insidente. Bangud sini, iya ginpanukala ang pagdili ukon mas mahugot nga regulasyon sa paggamit sang social media para sa mga kabataan nga nagapangidaron sang 16 anyos paubos.
Sa pihak sini, nagpanawagan man ang Amnesty International Philippines nga indi paggamiton ang trahedya bilang basehan sa pagpaubos sang criminal age. Suno sa grupo, mas dapat tutukan sang gobyerno kag sang komunidad ang mga ugat sang problema pareho sang kakulangan sa proteksyon, pag-atipan kag suporta para sa mga kabataan.
Gindugang pa nila nga sa madamo nga kaso, ang mga kabataan nga nalalambot sa kriminalidad indi lamang mga suspek kundi mga biktima man sang kakulangan sang suporta gikan sa pamilya, komunidad kag mga institusyon nga dapat nagaproteher sa ila.
Bangud sini, ginaduso sang nagkalainlain nga sektor ang mas komprehensibo nga mga programa para sa mental health, child protection, digital safety kag rehabilitasyon imbes nga pagbag-uhon ang kasamtangan nga edad sang kriminal nga responsibilidad para sa mga menor-de-edad.
