Sa liwat nga ginbuksan ang diskusyon angot sa hagda nga mas istriktohan ang pag-access sang mga kabataan nga nagapang-edad 15 paubos sa social media kasunod sang madugon nga pagpangluthang sa sulod sang San Jose National High School sa Tacloban City sang Lunes, Hunyo 22.
Suno kay Senador Joel Villanueva, Chairman sang Senate Committee on Higher Technical and Vocational Education, kinahanglan usisaon ang nagkalainlain nga mga salik nga nakaimpluwensiya sa pamatasan kag kaayuhan sang kabataan, lakip na ang ila paglantaw sa peligroso kag makahalit nga mga content sa online.
Ginpabug-atan niya nga ginapakita sang amo nga insidente ang panginahanglan nga mapagtuunan sang pagtuon ang mga tikang agud mapauswag pa ang pagpanalipod sa mga kabataan kag menor de edad, lakip na ang mga panukala nga hugtan ang paggamit sang social media para sa mga nagaedad below 15 anyos.
Sa kasamtangan, may pila ka mga hagna nga nagatinguha mag-regulate sang paggamit sang social media sang mga menor de edad nga nagapabilin pa nga wala matapos sa Kongreso.
Ginaduso man sang senador ang mas mabaskog nga mental health programs, kaangay sang pagdugang sang numero sang guidance counselors agud suportahan ang mga panginahanglan sang mga estudyante.
Nagapanawagan man siya nga usisaon ang safety kag threat-assessment protocols sa mga eskwelahan sa bug-os nga pungsod, lakip ang pagpaayo sang pag-ila sa mga warning signs sang kapintas, mas mabaskog nga koordinasyon sa tunga sang mga eskwelahan, ginikanan, lokal nga panguluhan kag law enforcement agencies, pagpalapad sang anti-bullying initiatives kag pagbag-o sang emergency response plans.
