Pormal nga gindeklarar ang State of Calamity sa banwa sang Lake Sebu bangud sa halit nga gintuga sang magnitude 7.8 nga pagtay-og sa Southern Mindanao sang nagligad nga Hunyo 8.
Nagdangat naman sa masobra 1,200 kabalayan ang napagkit nga totally kag critically damaged samtang ginabalor nga yara sa P40 milyon sang kabug-usan nga danyos sa banwa.
Sa interview sang Bombo Radyo Koronadal kay Lake Sebu Mayor Antonio Fungan, iya ginpahayag nga mahimo na mgakuha sang porsyon sa pondo halin sa P50 milyong calamity fund sang probinsya sang South Cotabato bangud nalab-ot na ini ang requirement agud makadeklarar sang state of calamity ang isa ka probinsya nga naapektuhan sang kalamidad.
Sa karon, nagapadayon ang relief assistance sa mga banwa kag lugar sa probinsya agud magdul-ong sang nagakaigo nga panginahanglanon samtang nagapadayon ang operasyon para sa relief, assessment, kag rehabilitasyon sa lugar.
