Ginpabutyag ni South Cotabato Governor Reynaldo Tamayo Jr. nga kinahanglan mangin responsable ang mga lokal nga panguluhan sa pagdeklara sang state of calamity kag indi ini dapat himuon bilang ordinaryo nga pamaagi sa pagkuha sang pondo.
Suno sa gobernador, ang deklarasyon sang state of calamity angay lamang ipatuman kon may yara ang seryoso kag lapad nga epekto ang isa ka kalamidad, bangud ang calamity funds dapat magamit lamang sa mga prayoridad nga kinahanglanon sang mga komunidad nga labaw nga naapektuhan.
Dugang ni Tamayo nga sa sulod sang nagligad nga tatlo tubtob apat ka tuig, subong lamang liwat siya nagdeklara sang state of calamity sa probinsya.
Apang bangud sa kabug-aton sang epekto sang nagluntad nga sitwasyon, ginhingyo kag gin-aprubahan ang deklarasyon agud mahatagan dayon sang nagakaigo nga bulig ang mga pamilya kag komunidad nga nagakinahanglan sang suporta sang gobyerno.
Gindugang pa ni Tamayo nga ang transparency kag accountability sa paggamit sang calamity funds kinahanglan mangin prayoridad agud masiguro nga ang kada sentimo sang pondo mapadulong sa relief, rehabilitasyon kag iban pa nga mga serbisyo nga makabulig sa mga apektado, kag indi magamit sa mga proyekto nga wala sang kaangtanan sa sitwasyon.
