Posible nga pagahisgutan ni President Ferdinand Marcos Jr. kag Russian President Vladimir Putin ang plano nga pagtukod sang floating nuclear power plant sa Pilipinas.
Ini bisan pa nga wala pa ginagamit sang Pilipinas ang nuclear energy bilang kabahin sang kasamtangan nga energy mix sang pungsod.
Suno kay Philippine Ambassador to Russia Igor Bailen, madugay na nga ginatukod ni President Marcos ang plano nga mapasulod ang nuclear energy sa Pilipinas agud mapalig-on ang sektor sang enerhiya.
Posible man suno sa iya nga pagahisgutan sang pangulo ang paggamit sang small modular nuclear reactors (SMRs), bangud kilala ang Russia sa amo nga teknolohiya.
Ginpahayag ni Bailen nga ang Russia amo ang una nga pungsod nga madinalag-on nga nakagamit sang amo nga teknolohiya, gani posible nga gamiton sang pangulo ang oportunidad agud mapauswag ang nasambit nga proyekto.
Sa una nga tatlo ka tuig sang administrasyon ni Marcos, napasar ang Philippine National Nuclear Energy Safety Act (Republic Act 12305) nga nagtukod sang independent nga Philippine Atomic Energy Regulatory Authority (PhilATOM).
Ginpahayag sang administrasyon nga ila ginatumod nga matukod kag mapaandar ang una nga nuclear power plant sang Pilipinas sa tuig 2032.
