Nagdangat na sa masobra 1,200 kabalayan ang napagkit nga totally damaged kag critically damaged samtang ginabulubanta nga nagaabot sa P40 milyon ang balor sang kahalitan nga tuga sang mabaskog nga linog sa banwa sang Lake Sebu.
Sa interview sang Bombo Radyo Koronadal kay Lake Sebu Mayor Antonio Fungan, ginpahayag sini nga masobra 200 ka pamilya ang naapektuhan kag napilitan nga magbakwit halin sa ila mga puluy-an bangud sang epekto sang magnitude 7.8 nga linog sang Hunyo 8.
Napagkit man ang mga landslide sa halos tanan nga barangay sang Lake Sebu, kun sa diin lakip sa pinakamabug-at nga naapektuhan amo ang Barangay Lamlahak.
Samtang, padayon ang assessment sang Mines and Geosciences Bureau (MGB) kag Philippine Institute of Volcanology and Seismology (PHIVOLCS) ang sitwasyon sa Barangay Takunel bangud sang mga naobserbahan nga tension cracks sa duta nga mahimo magdala sang dugang nga kahalitan sa mga residente.
Bangud sang kalaparon sang damage, ginahulat na lamang sang lokal nga panguluhan ang pormal nga resolusyon para sa deklarasyon sang State of Calamity sa banwa.
Sa karon, nakapanagtag na ang Provincial Disaster Risk Reduction and Management Office (PDRRMO) sang relief assistance sa 78 ka apektado nga pamilya sa Sitio Tibong, Barangay Takunel sa ila gilayon nga mga kinahanglanon samtang padayon ang mga operasyon para sa relief, assessment kag rehabilitasyon sa lugar.
