Ginpahayag sang Philippine Institute of Volcanology and Seismology nga ang Mount Kanlaon nagapabilin sa Alert Level 2 matapos makapagkit sang nagkalain-lain nga aktibidad sa nagligad nga mga adlaw.
Suno sa PHIVOLCS, napagkit ang 12 ka pagbuga sang abo nga naglawig halin apat tubtob 101 ka minuto.
Nakapagkit man ang ahensya sang 18 ka volcanic earthquakes, lakip ang 11 ka volcanic tremors nga naglawig sang tatlo tubtob 101 ka minuto.
Luwas sini, nag-abot sa 979 ka tonelada kada adlaw ang sulfur dioxide nga ginbuga sang bulkan sang Hunyo 15, 2026.
Nakita man ang plume ukon aso nga may kataason nga 700 metros, may katamtaman nga pagsungaw halin sa bulkan.
Ginpahayag man sang PHIVOLCS nga may naobserbahan nga inflation sa bulkan, nga posible nga nagapakita sang pagsaka sang magma sa idalom sang bulkan.
Bangud sini, ginapahanumdom sang ahensya ang publiko nga likawan ang pagpalapit sa sulod sang 4-kilometro nga Permanent Danger Zone (PDZ) bangud sang posible nga hinali nga pagbuga sang abo, volcanic tremors kag iban pa nga aktibidad nga mahimo magresulta sa paglupok sang bulkan.
Padayon naman nga ginamonitor sang PHIVOLCS ang kahimtangan sang Bulkang Kanlaon agud masiguro ang kaluwasan sang mga residente nga nagaestar malapit sa bulkan.
