Ginkondenar sang mga mamamahayag nga naga-cover sa Senado ang pahayag ni Sen. Rodante Marcoleta nga madamo nga katapo sang mainstream media ang “bayaran”.
Sa isa ka opisyal nga pahayag, ginpahayag senate press nga iresponsable kag wala sang bastante nga basehan ang akusasyon sang senador nga ginhimo sa hearing sang Senate Blue Ribbon Committee sang Huwebes.
Suno sa grupo, indi makatarunganon ang nasambit nga pahayag sa mga mamamahayag nga padayon nga nagatuman sang ila katungdanan sa pagdul-ong sang husto kag nagakaigo nga impormasyon sa publiko.
Ginhatagan man sang pagtamud sang senate press nga importante ang papel sang media sa isa ka demokratiko nga katilingban bangud ini ang naga-analisar sang mga isyu, naga-verify sang impormasyon, kag nagapanabat sa mga yara sa poder.
Suno sa media sang senado, dapat maghalong ang mga opisyal sang gobyerno sa ila mga pahayag, ilabi na sa panahon nga nagalapta ang sala nga impormasyon kag mabaskog ang pagbinahin-bahin sa pulitika.
Gindugang pa sang grupo nga kun wala sang basehan ang mga alegasyon batok sa media, mahimo ini nga makaguba sang pagsalig sang publiko sa lehitimo nga journalism kag makatuga sang risgo sa mga journalists.
Ginpanindugan man nila nga indi dapat mag-intra ang media sa mga inaway sa pulitika bangud ang panguna nga katungdanan sini amo ang pagserbisyo sa publiko kag pagdul-ong sang kamatuoran.
Nagpanawagan man ang Senate media kay Marcoleta kag iban pa nga opisyal sang gobyerno nga suportahan ang ila mga alegasyon batok sa mga mamamahayag paagi sa ebidensya.
