Apesar may yara na sang ginpatuman nga P160 minimum farmgate price kada kilo sang buhi nga baboy sa Polomolok, South Cotabato, may mga buyers kag ahente gihapon nga nagatanyag sang mas manubo nga presyo nga nagalab-ot lamang sa P140 kada kilo.
Sa interview sang Bombo Radyo Koronadal ginpahayag ni Amy Jean Jugador, lider sang Polomolok Hog Raisers, nga ginpirmahan ni Mayor Bernie Palencia sang Nobyembre 18 ang Executive Orders 073, 074 kag 075, nga nagalakip sa pagpatuman sang minimum farmgate price, pinansyal nga bulig sa hog raisers kag mas hugot nga tikang batok sa African Swine Fever (ASF).
Bangud sini, nagapanawagan ang grupo nga magpasar sang municipal ordinance nga may kaangut nga penalidad agud mapanabat ang mga nagalapas sa ginpatuman nga minimum price.
Ginpahayag man ni Jugador nga break-even lamang ang P160 kada kilo kag kinahanglan maglab-ot sa P180 agud makakuha sang makatarungan nga ganansya ang mga hog raisers.
Dugang pa, ginahingyo nila ang Municipal Agriculture Office nga hugot nga bantayan ang mga entry points sang banwa agud mapunggan ang pagsulod sang mga baboy halin sa iban nga lugar nga mahimo makaapekto sa presyo kag magapataas sang risgo sang ASF.













