Nagpakita sang mabaskog nga determinasyon kag teamwork ang Rehiyon Dose Sepak Takraw Boys Team agud makuha ang bulawan nga medalya sa 2026 Palarong Pambansa sa Agusan del Sur.
Sa interview sang Bombo Radyo Koronadal kay Sepak Takraw Coach Jade Cesar Sulan sang T’boli National High School, ginpahayag sini nga ang champion team ang ginabug-usan sang 15 ka mga atheleta gikan sa nagkalain-lain nga mga buluthuan sa South Cotabato kag syudad sang Koronadal.
Lima sa mga atleta ang gikan sa T’boli National High School.
Suno kay Sulan, may yara sang mga pagbag-o sa selection process sang mga humalampang kun sa diin ang champion division amo ang may pinakadaku nga kontribusyon sa line-up sang rehiyon.
Nagtuga ini sang mas mabaskog nga kombinasyon sang mga atleta nga nagrepresentar sang Rehiyon 12.
Ginbuyagyag ni Sulan, nga isa sa ila pinakamabudlay nga komprontasyon amo ang mga delegado sang Western Visayas sa elimination round, sa diin nakaeksperyensya sila sang kapierdihan bangud sa service errors.
Apang sa baylo nga madulaan sang kumpiyansa, gingamit sang grupo ang kapaslawan bilang inspirasyon agud mapasanyog ang ila performance.
Pagkatapos sang dugang nga pag-ensayo kag maid-id nga pagtutok sa ila mga abilidad, ang mga atleta nagpakita sang mas tayuyon nga hulag sa game court halin sa quarterfinals tubtob sa hampang sang kampeonato nga nakabulig sa ila nga makuha ang ginahandum nga bulawan nga medalya.
Dugang pa ni Sulan, dako ang posibilidad nga ang Rehiyon Dose ang nagdaug sa mga individual awards kaangay sang Best Feeder kag Best Tekong.
Ang duha ka standout players nga sanday J.R. Estabosa kag Gerald Owen Evangelio nga halin man sa syudad sang Koronadal ang ginpahayag nga gin-recruit sang buluthuan nga gina-develop sang mga katapo sang Philippine National Team sa Manila.
Para sa coach, mas makabuluhan pa ang ila kadalag-an bangud ini na ang last playing year sang pila ka mga atleta, nga naghatag sa ila sang pinaka-improved nga performance para sa Rehiyon 12.
Ginpasalamatan ni Sulan ang tanan nga nagsuporta sa grupo, ilabi na ang Ginoo, ang mga coaches, ginikanan kag mga buluthuan nga nagbulig agud malab-ot ang magartason nga kadalag-an sang rehiyon sa sepak takraw.
