Mabaskog nga ginkondenar sang Sambayanan ang mga nagluntad nga insidente nga suno pa klaro nga paglapas sa integridad kag independensya sang Senado.
Sa exclusive interview sang Bombo Radyo Koronadal kay Secretary General Jeffrey “Ka Eric” Celiz sang Sambayanan, iya ginpahayag nga ang sini nga mga hitabo indi dapat ginalikawan bangud direkta ini nga nagaapekto sa kredibilidad sang institusyon kag sa pagsalig sang publiko sa sistema sang gobyerno.
Gindugang pa niya nga kun indi ini gilayon maaksyunan sang mga opisyale, posible nga magtuga ini sang mas mabaskog nga tensyon pulitikal nga mahimo magresulta sa kalibugan kag instability sa sulod sang mga importante nga institusyon sang pungsod.
Suno pa kay Celiz, importante nga magpabilin nga mabaskog ang Senado bilang isa ka independente nga departmento sang gobyerno kag indi dapat maimpluwensyahan sang bisan ano personal interes ukon kinagamo.
Bangud sini, nagpanawagan si Celiz sa gobyerno nga magpatigayon sang mabinungahon kag husto nga imbestigasyon kag klaruhon ang bug-os nga insidente agud malikawan ang paglapta sang sala nga impormasyon kag mapabilin ang kalinong kag seguridad sang publiko.
