KORONADAL CITY – Nagsumiter sang pormal nga petisyon ang City of Koronadal TODA Federation, Inc. (CKTODAF, INC.) kanday Mayor Erlinda P. Araquil kag Vice Mayor Ester M. Catorce para sa isa ka provisional fare increase ukon temporaryo nga pagsaka sang plete sa tricycle.
Sa ginpadala nga sulat nga ginpadala sang CKTODAF nga pirmado sang Presidente nga si Brando Cabiles, ini nga tikang tuga sang asod-asod kag dako nga pagsaka sang presyo sang langis nga naga-apekto sa inadlaw-adlaw nga income sang mga driver kag operator sa siyudad.
Sa idalom sang ginapanugyan nga “fare adjustment scheme,” amo ini ang mangin basehan sang dugang nga plete:
- Kon ang presyo sang langis yara sa Php 60.00 tubtob Php 80.00 kada litro, may dugang nga Php 5.00 sa plete.
- Kon maglab-ot ang presyo sa Php 81.00 tubtob Php 100.00 kada litro, ang base increase mangin Php 5.00, kag may dugang pa gid nga Php 3.00 sa kada masunod nga “increase bracket.”
Ginpahayag ni Vice Mayor Catorce sa regular nga sesyon sang Sangguniang Panlungsod nga ginpasa na ang ini nga hingyo sa Committee on Transportation nga ginapamunuan ni Councilor Edwin Abris.
Sa karon, pagatun-an sang komite ang epekto sini sa mga driver kag mga pasahero agud masiguro nga mangin patas ang desisyon para sa tanan antes ini aprobahan.
