Ginpabaskog sang Department of Education (DepEd) ang ila reintegration support para sa mga overseas Filipino worker (OFW) nga mga manunudlo nga nagabalik sa Pilipinas, bangud sang nagadugang nga numero sang mga guro nga nagarequest nga makabalik sa lokal nga buluthuan.
Sa ginpatigayon nga “Bayanihan Para sa Balikbayang Manggagawa National Reintegration Network (NRN) Fairs” kaupod ang Department of Migrant Workers, ginhatagan sang access ang mga nagabalik nga licensed teachers kag ila pamilya sa stable nga trabaho kag edukasyonal nga serbisyo.
Suno kay Education Secretary Sonny Angara, ini nga programa nagatuman sang direktiba ni President Ferdinand R. Marcos Jr. nga siguruhon nga may maayo nga trabaho nga nagahulat sa mga nagabalik nga manunudlo agud indi na sila mapilitan nga malayo liwat sa ila pamilya.
Ginpabug-atan niya nga indi sila pagbayaan sang gobyerno sa pag-atubang sang mga pagsuliran sa pagbalik nila.
Ginlunsyar man ni Marcos kag Angara ang regional fairs sa Tacloban City sang Abril 15 bilang kabahin sang whole-of-government effort para suportaran ang OFWs nga naapektuhan sang mga tensyon sa Middle East.
Suno sa datos, madamo nga mga guro ang nagpakita sang interes sa Sa ‘Pinas, Ikaw ang Ma’am at Sir (SPIMS) Program, nga naga-offer sang dalan para makabalik sila sa public school system.
Sa lain nga rehiyon, nagrehistro sang libo-libo ka inquiries ang mga OFW teachers nga nagapangita sang oportunidad sa pagtudlo, samtang gin-offer man sang DepEd ang scholarships, education subsidies, kag iba pa nga support services para sa ila kag sa ila mga pamilya.
