Gin-arestar ang anay Philippine Basketball Association (PBA) player nga si Mark Cardona matapos maulamid sa gina-alegar nga kaso sang harassment sa Bonifacio Global City sa Taguig.
Ginpatigayon ang pag-arestar sang mga operatiba sang pulisya sandig sa reklamo nag ginpasang-at sang isa 21-anyos nga babaye.
Suno sa datos, gina-alegar nga hinali na lang ginkaptan ni Cardona ang kamot sang biktima kag ginhalukan ini nga wala sang consent ukon pagtugot.
Gina-alegar man nga nangin agresibo ang suspek sang gintiklod sang nobyo sang biktima ini kag hangkaton sang away.
Bangud sini, nagpaduk-ong sa bouncer ang biktima agud ireport ang insidente, apang nagpadayon sa gihapon sang agresibo nga pamatasan ni Cardona kag gina-alegar nga gintuslok pa sini ang mata sang lalaki.
Sandig sa inisyal nga imbestigasyon, may iba pa nga kababaihan nga nagpasang-at sang reklamo kag ginpahayag nga naeksperyensyahan man nila ang kasubong nga insidente.
Sa karon, nagpadailom na sa inquest proceedings si Cardona kag magaatubang sa kaso nga acts of lasciviousness kag physical injury.
Naghampang si Cardona para sa Talk ‘N Text Tropang Texters kag Meralco Bolts kag nangin kabahin man sang national team pool.
