Nagpatuman sang pansamantala nga hybrid work arrangement ang Presidential Communications Office (PCO) kun sa diin apat ka adlaw kada semana ang onsite sa opisina kag isa ka adlaw naman ang work-from-home (WFH).
Ini suno sa direktiba ni Pangulong Ferdinand R. Marcos Jr. agud magpatuman sang mga tikang sa pagtigana sang enerhiya bangud sa nagapadayon nga krisis sa Gitnang Silangan.
Base sa memorandum nga ginpirmahan ni Acting Secretary Dave M. Gomez sang Marso 8, ginmanduan ang tanan nga empleyado nga magreport onsite halin Lunes tubtob Huwebes, samtang ang Biyernes ang gin-designate nga WFH day, maliban sa mga output-based nga Contract of Service (COS) personnel.
Ang tikang nagasunod sa Memorandum Circular No. 114, nga nagamando sa tanan nga ahensya sang gobyerno nga magpatuman sang mga pamaagi sa energy conservation kag efficiency agud mapakunhod ang konsumo sang kuryente kag gasolina.
Gintugutan man ang mga empleyado nga mag-adjust sang ila working hours halin 7:00 a.m. tubtob 6:30 p.m., basta makumpleto ang 40 ka oras nga trabaho kada semana. Kinahanglan man nga magsumite ang mga cluster heads kag supervisor sang binulan nga work program agud maggiya sa buluhaton sang mga empleyado sa ila WFH nga adlaw.
Ang attendance kag productivity sang mga empleyado pagamonitoron paagi sa digital attendance system nga ginadumalahan sang Information and Communications Technology Division.
Lakip man sa memorandum ang mga tikang sa pagtigana sang enerhiya sa New Executive Building, pareho sang husto nga paggamit sang suga kag air-conditioning, pagtakda sang thermostat sa 24°C, kag pagsiguro nga ang mga office equipment naka-set sa energy-saving mode kon indi ginagamit.
Suno sa PCO, ang hybrid work arrangement nga ini pansamantala lamang kag magapadayon tubtob nagapabilin ang direktiba sang Pangulo parte sa pagtigana sang enerhiya.
