KORONADAL CITY – Nagapadayon ang imbestigasyon sang epidemiology units sang Sultan Kudarat ang pagkapatay sang isa ka 2-anyos nga bata nga babaye sa Palimbang sang Pebrero 4, 2026 nga ginaangot sa bakuna.
Ini matapos naglapta ang impormasyon nga napatay ini matapos nga bakunahan sang Measles-Rubella (MR) vaccine.
Sa interview sang Bombo Radyo Koronadak kay Wendell Joe C. Donguines, RMT, MSPH-HA, Provincial Health Education Promotion Officer, wala pa sang kumpirmado nga gintunaan sang kamatayon sang biktima kag indi pa pat-od kun ini ang bangud sa bakuna.
Hugot man nga gin-insister ni Donguines nga luwas kag epektibo ang MR vaccine, kag madugay na ini nga ginagamit sa bug-os nga kalibutang agud nga protehiran ang mga bata batuk sa tipdas kag rubella.
Padayon man suno pa ang MR Supplemental Immunization Activity (SIA) sa probinsiya halin sang Enero 19 tubtob Pebrero 13, 2026 bilang kabahin sang kampanya sang gobyerno batuk sa makalalaton nga sakit.
Naghatag man sang pinansyal kag psychosocial nga bulig ang LGU Palimbang sa nabilin nga pamilya sang bata.
Nagapanawagan man si Donguines sa publiko nga likawan ang pagpalapta sang espekulasyon kag indi beripikado nga impormasyon sa social media, kag nagalaum na lamang sa opisyal nga anunsyo sang Department of Health, PHO Sultan Kudarat, kag mga LGUs.
kadungan sini, ginaawhag man sini ang mga ginikanan nga siguradugon nga mabakunahan ang ila mga bata sang MR vaccine agud nga maprotehiran ang mga ini batuk sa anuman nga balatian.
