Ginpasang-atan sang kaso sang malversation kag graft sang Office of the Ombudsman si anay Senator Ramon “Bong” Revilla Jr. kag 6 nga opisyales sang DPWH 1st District Engineering Office bangud sa P92.8 milyon nga ghost flood control project sa Pandi, Bulacan.
Suno kay Assistant Ombudsman Mico Clavano, lakip sa mga akusado sanday Assistant District Engr. Brice Hernandez, Engr. Jaypee Mendoza, Arjay Domasig, Engr. Emelita Juat, Juanito Mendoza, kag Christina Pineda.
Ginapatihan nga nagsabwatan ang mga ini agud mapaguwa ang P76 milyon nga nakatalana para sa proyekto nga indi napatuman matapos ang inspeksyon.
Gin-umalid ni anay DPWH Undersecretary Roberto Bernardo si Revilla kag ginpahayag nga nag-deliver siya sang P125 milyon sa balay ni Revilla sang 2024 kag dugang nga P250 milyon sa staff sini antes ang 2025 election.
Madumduman nga na-acquit si Revilla sa kaso nga plunder sang 2018 kaangot sang indi husto nga pag-usar sang PDAF.
