Nagapadayon ang imbestigasyon sang mga otoridad sa kaso sang isa ka anay CAFGU member sa Tacurong City nga nag-viral matapos ginaaligar nga nagpangharass kag nanakit sang isa ka babaye.
Ginkilala ang suspek nga si Randel Ecalnir Hebron, 26 anyos, residente sang Barangay New Carmen, Tacurong City, kag anay miyembro sang CAFGU nga na-assign sa 72nd Infantry Battalion.
Suno sa biktima nga si Jean Marie James, ginpakahuy-an siya sang suspek sa atubang sang publiko kag gin-sipa pa sa tiyan rason nga nagdagsa ang reaksyon kag pagkondena sang netizens matapos maglapta ang video online.
Nadiskubrehan man sang mga otoridad nga nagpakuno-kuno si Hebron nga Scout Ranger kag nagapasundayag sang mga litrato nga gin-photoshop para magpati ang publiko nga lehitimo siya nga miyembro sang 803rd Brigade.
Dugang pa sang Tacurong City Police, may yara na ini sang nahauna nga kaso sang pagpangawat sa Barangay Kudanding, Isulan, Sultan Kudarat.
Nagpahanumdom man si Colonel Harold Cabunoc sang Scout Ranger sa publiko nga indi basta-basta magpati sa mga nagasul-ob sang uniporme nga nagasolicit kwarta, naga-recruit kuno para sa military, ukon nagagamit sang military identity sa social media bangud kadam-an sini peke kag ginagamit sa panunto.
Bangud sa natabo, dako ang posibilidad nga magapangatubang sang panibag-o nga kaso ang suspek.
