Ginapahayag sang Bureau of Immigration (BI) nga ginatuyo nila karon kon sinu-sinu sa 33 ka personalidad nga ginpaidalom sa Immigration Lookout Bulletin Order (ILBO) ang yara na sa guwa sang pungsod. Suno kay BI spokesperson Dana Sandoval, ginapaabot nga mahibaluan subong nga adlaw ang listahan sang mga indibidwal nga wala sa Pilipinas.
Sa nasambit nga mga personalidad ginapaimbestigahan may kaangtanan sa ginapatihan nga maanomalyang flood control projects nga nagabalor sang bilyon-bilyon ka pesos. Kalakip sa mga ngalan sa ILBO ang pila ka mga mambabatas, anay opisyal sang gobyerno, kag mga yara karon sa serbisyo publiko. Katuyuan sang ILBO nga bantayan ang hulag sang mga nadalahig samtang ginahimo ang mas madalom nga imbestigasyon. Ang ILBO isa ka mekanismo sang Department of Justice (DOJ) nga ginapadala sa Bureau of Immigration agud alertuhan ang mga immigration officer sa mga indibidwal nga may ginapangatubang nga imbestigasyon ukon kaso. Indi ini pareho sa hold departure order, apang nagaserbe nga paandam agud masubaybayan ang pagguwa sa pungsod sang mga nadalahig.
Ini nga imbestigasyon ginapamunuan sang Independent Commission for Infrastructure (ICI), nga naga hibalo sa mga flood control projects nga ginapatihan nga overpriced, ghost projects, ukon wala nagasanto sa aktuwal nga implementasyon. Ang pila sa mga proyekto ginasiling nga ginpondohan sang dalagku nga kantidad apang wala sang bastante nga ebidensya sang aktuwal nga konstruksyon.
