Ginapahugtan sang mga awtoridad sa India ang seguridad sa kabisera nga Delhi antes ang malapad nga kilos-protesta sang oposisyon nga nagapanawagan sang pagbibitiw ni Chief Election Commissioner Gyanesh Kumar bangud sa kontrobersyal nga pagrepaso sang listahan sang mga botante.
Nagpakalat ang kapulisan sang mga personnel nga may baton kag riot shields, lakip ang riot control vehicles, sa Ramlila Maidan kun sa diin pangunahan ni Congress party leader Rahul Gandhi ang rally.
Ginapaabot nga magpartisipar ang ginatos ka libo ka tawo sa protesta, nga pagasundan sang 1.5 kilometro nga pagmartsa halin sa Central Delhi.
Nag-ugat ang kontrobersiya sa pagtanggal sang kapin 130 milyones ka ngalan sa voter list sugod sang nagligad nga tuig, lakip ang mga napatay, nagbalhin sang puluy-an kag wala na makita nga mga botante.
Suno sa oposisyon, posible nga mas naapektuhan sini ang mga Muslim kag iban nga minority groups nga indi manug-suporta sa nagadumala nga Bharatiya Janata Party ukon BJP.
Apang ginpanginwala sang Election Commission ang alegasyon sang pagpabor sa partido kag ginpahayag nga mahimo magparehistro liwat ang mga botante nga sayop nga naalis sa listahan.
Nagpaandam naman ang Delhi Traffic Police sa mabug-at nga trapiko kag nagpatuman sang mga pagbag-o sa ruta bangud sa protesta.
