Nagtaliwan na ang isa ka 18-anyos nga si alyas Leo nga nagluthang sa suno pa anay nobya sini sa sulod sang Sta. Rosa Integraded School kahapon, Agosto 7.
Ini ang ginkumpirmar sang isa ka himata ni Leo sa isa ka pahayag subong nga Biyernes, Agosto 8, kun diin napatay na suno pa ang solterito matapos nga makaangkon sang pilas sa ulo bangud sa pagluthang sang iya kaugalingon pila ka minuto matapos nga ginluthang man sini si ang 15-anyos nga si alyas Lea.
Sandig sa inisyal nga imbestigasyon, nagluntad ang insidente sa mismo sulod sang classroom ni Lea. Naigo ini sang bala sa liog nga gilayon naman gindala sa isa ka hospital sa Cabanatuan City, kun diin padayon ini nga ginaobserbahan kag nagapabilin nga yara sa kritikal nga kondisyon.
Nagpanawagan man ang pamilya ni Lea sang bulig pinansyal para sa operasyon kag padayon nga pagbulong sa dalagita.
Sa separar nga post sa social media ginpakigbahin sang himata sini nga padayon nga nagapakigbato sa kamatayon ang biktima sa pihak sang naangkon nga pilas.
Padayon man ang imbestigasyon sang mga awtoridad angot sa insidente kag sa motibo sang krimen.
Samtang, sa separar nga pahayag, pareho nga ginakondena sang DepEd Central Office kag Schools Division Office (SDO) sang Nueva Ecija ang hitabo.
Samtang, ginapahugtan naman ang seguridad sa eskwelahan kag nakig-angot na ang SDO sa kapulisan para sa maidid nga imbestigasyon.
Nagpain naman sang psychosocial support kag stress debriefing para sa mga estudyante kag manunudlo nga apektado sang insidente.
