Ginkamatay sang masobra sa 170 ka mga tawo sa eastern Pakistan ang malapnagon nga pagbaha sa ila lugar sang damlag lang.
Suno sa ila National Disaster Management Authority (NDMA), indi magnubo sa 54 sa mga biktima ang napatay sa sulod sang 24 oras matapos ang mabaskog nga pag-ulan nga nagtuga sang nagaragasa nga baha sa probinsya sang Punjab nga amo ang pinakamatawo nga lugar sa Pakistan.
Pahayag pa sang NDMA, nga indi naman magnubo sa 85 ka kabataan ang napatay halin pa sang magsugod ang pagbaha sang June 26.
Paathag sang aid agencies, nga mas dako ang kahangawa nila karon sa kabataan bangud sang risgo sang pagkalumos kag pag-angkon sang makamamatay nga balatian gikan sa waterborne diseases.
Sa karon, gindeklarar na ang state of emergency sa pila ka mga distrito sang nasambit nga probinsya kag gin-deploy ang militar sa syudad sang Rawalpindi para makabulig nga solusyunan ang nagataas pa nga lebel sang baha.
