Yara sa kritikal nga kondisyon sa karon ang isa ka nagabiskleta matapos maimbolbar sa isa ka vehicular accident sa Barangay Topland, syudad sang Koronadal. Ini ang nangin pahayag ni PMSgt. Fely Bascon, – traffic investigator, sa interview sang Bombo Radyo Koronadal.
Suno kay Bascon, gilayon nga gindala sa Cotabato Hospital ang biktima sang iya pamilya sa diin yara ini sa kritikal nga kondisyon bangud sa naangkon niya nga blood clots.
Ginkilala ang nagabiskleta nga si Jerson Trinidad, 66 anyos kag ang nagamaneho sang Kawasaki Bajaj nga si alyas “Imba,” kaupod ang duha niya ka angkas nga lunsay mga menor de edad.
Base sa imbestigasyon, naghalin ang nagabiskleta sa direksyon sang Barangay Rotonda pakadto sa Topland.
Pag-abot niya sa lugar sang insidente, nagliko ini pawala, apang bangud sa madasig nga pagpadalagan sang isa ka motor nga nagasugata, wala nakalikaw ang motor kag nabungguan ang nagabiskleta.
Magluwas diri, nabanggaan man sang motor ang isa ka Nissan pickup nga nakapark sa kilid sang dalan.
Suno pa saiya, wala sa impluwensya sang makahulubog nga ilimnon ang mga menor de edad, apang ginpahayag nga madasig gid ang ila pagpadalagan sang motor.
Gindala man sa balay bululgnan ang mga menor de edad bangud sa na angkon nga minor injuries, apang gilayon man sila nakagwas.
Sa karon, nakigstorya na ang pamilya sang biktima kag pamilya sang nakamotor, angot sa settlement sa diin nagapangayo sang financial assistance ang pamilya sa nagabiskleta.
Nagpanawagan naman si PMSgt. Bascon sa tanan nga motorista nga magsuksok sang standard nga helmet kag maghalong pirmi sa dalanon agud malikawan ang pareho nga disgrasya.
