Tatlo na ka kumpirmado nga kaso sang Monkeypox ukon Mpox ang narehistro sa probinsya sang Sultan Kudarat.
Ini ang ginkumpirmar Dr. Gina C. Galinato, MD, MHcA, Provincial Health Officer II, sa isa ka eksklusibo nga panayam sang Bombo Radyo Koronadal.
Ginkumpirmar ni Dr. Galinato nga ang tatlo ka pasyente amo mga lalaki nga naga edad 18, 21 kag 45 anyos ang narekord nga positibo sa Mpox. Isa sa mga ini ang halin sa Bagumbayan samtang ang duha pa ang residente sang Tacurong City.
Suno kay Dr. Galinato, ang pasyente halin sa Bagumbayan, amo ang isa ka 18-anyos, yara na subong sa katapusan nga adlaw sang iya isolation nga matapos buwas.
Samtang ang duha pa ka pasyente sa Tacurong nga naga edad 21 kag 45 anyos, padayon nga yara sa home isolation.
Suno sa imbestigasyon, ang pasyente sa Bagumbayan may travel history sa Surallah, South Cotabato, nga posible nga amo ang ginhalinan sang impeksyon.
Ang 21-anyos nga pasyente sa Tacurong wala sang travel history samtang ang 45-anyos may kasaysayan sang sexual contact nga ginapatihan nga ginhalinan sang virus.
Padayon man ang ginahimo nga contact tracing sang tatlo ka pasyente.
Sa Tacurong, may isa ka close contact nga ginakabig subong nga suspected case.
Sa subong, ginklaro sang health office nga kon wala sang senyales sang balatian ang close contact, pwede ini nga magpadayon sa normal nga pangabuhi, apang kung makabatyag na ini sang senyales pareho sang lagnat, pagpanakit sang lawas, ginapangabay nga mag isolate na.
Nagapanawagan man ang Provincial Health Office sa publiko nga magpabilin nga alerto kag mag-obserba sang proper hygiene practices, likawan ang physical contact sa mga may sintomas, kag magkooperar sa health protocols agud malikawan ang dugang nga paglapta sang Mpox.
