Isa ka masubo nga insidente ang nagluntad sa Sitio Kitay, Barangay Salaman sang Biernes sang hapon ,Mayo 24, 2025, sang nadula sa baha ang isa ka iloy upod ang iya 12-anyos nga anak nga babayi.
Ginkumpirmar sang Sabado sang Lebak Municipal Disaster Risk Reduction and Management Office (MDRRMO) kag sang mga opisyal sang barangay sa Salaman ang kamatayon ni Maila Juanito Manansala Pulido, 34-anyos, kag sang iya bata nga si Mylene Pulido.
Suno sa inisyal nga report, gin agos sang mabaskog nga tubig ang mag-iloy ang ila puluy-an kag samtang nagabakwit sa peligro sang baha padulong sa mas mataas kag mas luwas nga lugar.
Narekober ang ila mga lawas nga wala na sing kabuhi sang mga barangay officials kag emergency responders nga gilayon nga nagresponde sa lugar.
Padayon ang pagpangayo sang mga residente sang Barangay Salaman sang bulig halin sa lokal nga gobyerno para sa dugang nga suporta kag seguridad batok sa mga natural nga kalamidad.
Samtang padayon pa ang pagpanghimo sang mga otoridad sang assessment kag pagpatuman sang mas epektibo nga disaster preparedness sa lugar.
