Isa ka miyembro sang Communist Terrorist Group (CTG) ang nagsungka sa mga otoridad sa bahin sang Barangay San Isidro, Koronadal City, suno sa kumpirmasyon ni Police Lt. Col. Peter Pinalgan Jr., hepe sang Koronadal City Police Station.
Suno kay Pinalgan, ang pagsurender sang nasambit nga indibidwal, nga ginkilala sa alyas “Waway”, resulta sang pinagsanib pwersa nga operasyon sang mga intelligence units sang gobyerno. Matapos ang masanag nga pagpakig-angut sang mga operatiba, napasugot si alyas Waway nga magbalik sa sabakan sang gobyerno bilang isa ka former member sang CTG.
Lakip sa mga narecover halin sa iya amo ang isa ka unit sang pistol, nga subong yara na sa kustodiya sang Regional Intelligence Unit para sa tamang dokumentasyon kag disposasyon.
Sa subong. ang nasambit nga surrenderee amo ang naga-agi sa further custodial debriefing.
Ginpahayag man ni Pinalgan nga posible nga may iban pa nga upod si alyas Waway nga kabahin sang CTG nga target sang padayon nga operasyon sang mga otoridad.
Ginapaabot man nga siya hatagan sang assistance halin sa Provincial Government bilang kabahin sang reintegration program para sa mga nagbalik-loob nga rebelde.
Padayon ang ginapatigayon nga monitoring kag operasyon sang mga law enforcement agencies sa posible pa nga mga miyembro sang grupo nga yara pa sa sulod sang South Cotabato.
