Tatlo ka mataas nga kalibre sang armas kag lima ka explosive ang nakuha sang mga kasuldaduhan sang 6th Infantry (Redskin) Battalion matapos ang ila engkwentro sa isa ka armado nga grupo.
Suno kay Lt. Col. Al Victor C. Burkley, Commanding Officer sang 6IB, nagatigayon sang patrolya ang iya mga tawo sang makasugata sila sang tatlo ka armado nga lalaki sa Brgy. Pagatin I, Shariff Saydona Mustapha, Maguindanao del Sur.
Kalakip sa mga nakuha ang isa ka Caliber .30 Sniper Rifle, isa ka Garand Rifle, isa ka RPG (rocket-propelled grenade launcher), lima ka rifle grenades, magasin kag mga bala.
Bangod sini, ginmanduan nila Brig. Gen. Jose Vladimir R. Cagara, Commander sang 1BCT kag Brig. Gen. Edgar L. Catu, Commander sang 601st Infantry Brigade ang tanan nga yunit nga ila sakop agud sundon ang mga nagpalagyo nga miyembro sang armado nga grupo.
