Magahatag sang P20,000 nga reward money ang alkalde sang banwa sang Makilala, Cotabato sa sin-u-man nga indibidwal nga magahatag sang impormasyon ukon magatudlo sa naglugos-patay sa isa ka menor de edad nga babaye sa Purok 2, Brgy. New Israel, Makilala, Cotabato.
Ini ang ginkumpirmar ni PCMS Ritchie Gesulga, imbestigador sang Makilala PNP sa interview sang Bombo Radyo Koronadal.
Suno kay Gesulga, hugot nga ginkundenar sang LGU Makilala ang natabo sa biktima nga si alyas Inday, 9-anyos kag isa ka Grade 3 pupil nga residente sang nasambit nga lugar gani nagdesisyon ang alkalde nga mahagatag sang reward money agud nga madali nga maresolbar ang kaso.
Naguwa sa imbestigasyon sang Makilala PNP nga tatlo na ka adlaw nga na-missing ang nasambit nga biktima humalin pa sang Nobyembre 23, 2024 sang hapon kag nasapwan na lamang pasado alas-6 kagab-i sa isa ka maligwin nga lugar nga malapit lamang sa sapa sa Purok 2 ,Brgy. New Israel sa nasambit nga banwa.
Natukiban man sa medico legal sang biktima nga ginlugos ini bagud sa pilas sa iya pagkababaye magluwas pa sa pwersa ini nga ginpatay.
Suno pa kay Gesulga, nasapwan ini sang mga residente man sang lugar nga natabunan sang hilamon kag yara na sa state of decomposition na.
Gindala na ang lawas sang biktima sa Wood Funeral Home sa Brgy Manongol, Kidapawan City kag natalana nga ipaidalom sa post mortem examination.
Padayon naman ang pagpanawagan sang hustisya sang pamilya sa natabo sa biktima.
