P350K inisyal nga danyos sa nasunog nga panimalay sa Polomolok,South Cotabato
KORONADAL CITY – Ginabulubanta nga yara sa masobra P350,000 ang inisyal nga danyos sa pagkasunog sang apat ka panimalay sa bahin sang Brgy. Cannery Site sa Polomolok sang Nobyembre 6, 2024 sang hapon.
Ini ang ginkumpirmar ni FO3 Kevin Villena, Fire Investigator sang BFP Polomolok sa interbyu sang Bombo Radyo Koronadal.
Suno kay Villena, naghalin ang kalayo sa isa ka balay nga gina pina-giyahan ni Gerome Serino nga isa ka electrician kun diin may nabatian ini nga naglupok nga kuryente sa iya nga second floor nga ginhalinan man sang pagkalayo sang ila nga kisame.
Gintinguhaan pa ni Serino nga maapula ang sunog apang mas madasig ang paglapta sang kalayo bangud nga light materials lamang ang ila nga balay.
Dugang pa ni FO3 Villena, maswerte naman nga nakaluwas ang mga kaupod sini nga panimalay bangud sa gin-una ini nga ginprotektahan sa mga bombero nga nagresponder sa sunog.
Dugang pa ni Villena, sa karon nagapadayon ang imbestigasyon sa kun ano ang ginhalinan sang sunog.
Kaangot sini, nagapanawagan man si Villena sa tanan nga mangin mahalong sa mga kagamitan sa balay ilabi na sa mga gamit nga may kuryente agud malikawan ang sunog.
