Ginpaandaman ni Agri party-list Rep. Wilbert Lee ang mga health officials nga iduso niya nga i-defer ang budget sang Department of Health (DOH) para sa 2025 kon indi pag-i-expand sang Philippine Health Insurance Corporation (PhilHealth) ang ila nga coverage.
Sa hearing sang house panel on appropriations subong nga Myerkules, September 4, ginpahayag ni Lee nga dapat malakip sa coverage sang PhilHealth ang cancer, problema sa mata, magnetic resonance imaging (MRI), positron emission tomography (PET), kag CT scans.
Pahayag ni Lee, nga ang hospital bill sang isa ka pasyente nga nagpaidalom sa radiofrequency ablation 3D mapping ang nagadangat sa P470,000 apang P24,000 lang diri ang ginasabat sang PhilHealth.
Sabat naman ni Health Secretary Teodoro Herbosa, bag-o nga procedure ang radio ablation gani posible nga wala ini malakip sang nagligad.
Ginpahayag man ni Lee nga tuman ka mahal ang diagnostic scans gani dapat man ini nga i-cover sang PhilHealth.
Ginkwestiyun man ni Lee ang DOH kag PhilHealth officials kon ngaa indi nila ma-expand ang coverage sang state health insurance.
Pasalig naman ni Herbosa, review-hon nila ang natumod nga packages.
Suno naman kay PhilHealth President and Chief Executive Officer Emmanuel Ledesma Jr., lantawon man nila sang maid-id ang ginahingyo ni Lee.
Sa nagligad nga hearing, ginpahayag ni Ledesma nga makalaum ang PhilHealth members nga may yara sang 30 percent nga pagsaka sa ila health benefits sa katapusan sang 2024.
