-- ADVERTISEMENT --

Nagpalig-on sang ila relasyon ang Bangko Sentral ng Pilipinas (BSP) kag Bank Negara Malaysia (BNM) matapos magpirmahanay ang duha ka institusyon sang Memorandum of Understanding (MOU) para sa mas madalom nga kooperasyon sa banking kag financial sector development.

Paagi sa kasugtanan, ginapaabot nga mapalawig pa ang pagbinuligay sang duha ka central banks sa nagkalain-lain nga aspeto sang pinansyal nga industriya, lakip na ang Islamic finance, cross-border payments, paggamit sang lokal nga currency sa mga transaksyon, kag pagpauswag sang digital financial services.

Suno kay BNM Governor Dato’ Sri Abdul Rasheed Ghaffour, nagakaigo ang pagpirma sang kasugtanan sa tion nga nagadugang ang kakumplikado sang kahimtangan sang ekonomiya kag pinansyal nga sektor.

Paagi sini, mas mapalig-on ang pagbayloay sang eksperyensya kag pag-atubang sa nagatuhaw nga mga hangkat.

Samtang, ginlaragway ni BSP Governor Eli Remolona Jr. ang MOU bilang isa pa ka importante nga tikang sa malawig na nga partnership sang Pilipinas kag Malaysia.

Dugang pa niya, importante nga ang ila kooperasyon indi lamang magtapos sa kasugtanan kundi magresulta man sa mas mabakod nga mga institusyon, mas maayo nga financial infrastructure kag mga programa nga makahatag sang konkreto nga benepisyo sa katawhan.

Ginapaabot sang duha ka central banks nga paagi sa sini nga inisyatibo, mas malawig ang integrasyon sang pinansyal nga sistema sa rehiyon kag mas mapauswag ang kooperasyon sa tunga sang duha ka pungsod