KORONADAL CITY – Yara na sa kustodiya sang kapulisan ang isa ka nagabaligya sang smuggled cigarettes matapos nga maaresto sang Koronadal City Police Station bangud sa pagdeliver sang mga kinarton nga sigarilyo sa Prk. Malipayon, Brgy. Sto. Niño, Koronadal City alas 3:00 kahapon sang hapon.
Ginkilala ni PLt. Col. Hoover Antonio, hepe sang Koronadal City PNP ang suspek nga si Aslam Abdulraman, 27 anyos, may asawa, kag residente sang Brgy. Datumanong, Tuburan, Lanao del Sur.
Suno sa Koronadal PNP, nakabaton sila sang impormasyon nga may puti nga mini van nga nakaparking sa Koronadal Sports Complex nga may dala nga pila ka kahon sang sigarilyo.
Gilayon nila ini nga ginsundan kag nadakpan sa akto nga nagpadulong sa tindahan agud magdeliver sang mga sigarilyo.
Sang ginpamangko ang suspek sang mga otoridad wala ini sang may napakita nga mga dokumento.
Nakumpiska kay Abdulraman ang 60 reams sang Canon Menthol cigarettes nga nagakantidad sang P18,000; kag 59 reams sang New Berlin cigarettes nga yara sa P17,700.
Sa karon, ginapreparar na ang kaso nga paglapas sa R.A 10863 ukon Customs Modernization and Tariff Act batuk sa napreso nga suspek.
