akapagkit ang Department of Health sang bag-o nga kaso sang mpox sa pungsod nga amo ang una nga kaso sang sini nga sakit sa sini nga tuig.
Suno sa ahensya, ang pasyente amo ang 33 anyos nga lalaki nga Filipino nga wala sang travel history sa guwa sang pungsod bisan pa nga may intimate contact tatlo ka semana antes nagpakita ang mga sintomas.
Tungod sini, nag-abot na sa kabug-osan nga 10 ka kaso sang monkeypox ang napagkit sa Pilipinas kag ang pinakaulihi nga kaso na-report sang nagligad nga tuig.
Base sa datos sang ahensya, nagsugod sang maramdaman sang pasyente ang mga sintomas pila ka semana na ang nakaligad.
Kalakip diri ang hilanat kag ginsundan ini sang rashes sa iya nga nawong, likod, batok, singit, palad, kag talampakan.
Gindala ang pasyente sa isa ka public hospital kung diin kuhaon ang mga specimen halin sa mga pilas sa panit kag gin-suri paagi sa real-time polymerase chain reaction (PCR) test.
Suno sa World Health Organization (WHO), ang mga sintomas sang mpox nagalakip sang skin rash ukono mucosal lesions, nga may lakip nga hilanat, sakit sang ulo, sakit sang muscles, sakit sang likod,kakapoy, kag pagbanog sang mga lymph node.
Kung madumduman, sang nagligad nga semana, gin-deklarar sang World Health Organization ang mpox nga global public health emergency sa ikaduha nga beses sa sulod sang duha ka tuig.
Ini kasunod sang pagbalik sang viral infection sa Democratic Republic of Congo kag paglapta sini sa mga kaiping nga pungsod.
