Ginmanduan ni Philippine National Police (PNP) chief Police Gen. Rommel Francisco Marbil ang tanan nga police units nga magresponder sa 911 emergency calls sa sulod sang tatlo ka minuto.
Ginhambal ini ni Marbil subong nga Domingo, bilang kabahin sang pagpaningwa sang PNP nga mapaligon pa ang kaluwasan sang publiko kag masiguro nga matubag dayon ang mga tawo nga yara sa peligro.
Suno kay Marbil, angay lang nga ang tagsa ka Pilipino mabatunan sang serbisyo sang kapulisan bisan ano pa ang ila lokasyon o estado.
Dugang pa niya, ang revitalized 911 hotline indi lang isa ka technological improvement. Ini isa ka importante nga bahin sang ila misyon nga himuon nga luwas kag suportado sang PNP ang tagsa ka komunidad.
Sa bag-o nga sistema, ginpabutyag ni Marbil ang kahalagahan sang kahandaan sang PNP sa pagtubag sa mga emergency.
