Ginabawian sang kabuhi ang isa ka drayber samtang kritikal naman ang kaupod sini matapos nga naipit sang magbaliskad ang ila ginasakyan nga 10-wheeler wing van sa boundary sang Patulangon, Malasila, kag Purok 11, Poblacion, Makilala, Cotabato alas 4:30 kaagahon sang Miyerkules, Agosto 7,2024.
Sandig sa impormasyon nagikan sa Makilala PNP, gingamitan sang boom truck kag backhoe sang Makilala LGU ang salakyan agud makuha ang duha ka biktima nga naipit.
Isa sa mga ginalantaw nga rason sa kamatayon sang driver ang mga pilas sini sa nagkalain-lain nga bahin sang iya lawas kag ang posibilidad nga nalumos ini matapos nga masentro sa kanal kag wala makahalin sa pagkaipit sa drivers seat.
Pila ka oras pa antes nga na-retrieve sang MDRRM, BFP akag kapulisan ang napatay nga driver.
Sa ginpaguwa nga datos sang kapulisan, may plate number nga LAK 8924 ang nasambit nga wing van nga may karga nga sinako sang mga bugas.
Nahibaluan nga halin sa Panacan padulong sa Cotabato City ang truck para ideliver ang mga bugas nga karga sang mga ini.
Ginahibalo pa sa karon ang identity sang mga biktima.
Ginakabig naman nga “Killer Highway” ang dalanon bangud sa madamo na ang naaksidente sa lugar.
