KORONADAL CITY – Dead on arrival sa balay bululngan ang duha (2) ka persona makaligad nga maulamid ang mga ini sa aksidente sa dalanon sa bahin sang Purok Garfin, Barangay Paraiso, Koronadal City.
Ginkilala sang Koronadal City PNP Traffic Section ang mga biktima sang sanday Joshua Caballero Talite, 20 anyos kag backrider sini ang si Christian Caballero 16, anyos nga lunsay mga residente sang Barangay Tuka, Bagumbayan, Sultan Kudarat.
Sandig sa imbestigasyon sang mga otoridad, ginasubay sang mga ini ang kalabaon sang national highway sa nasambit nga lugar sa wala mahibaluan nga kabangdanan, nagkadto ang mga ini sa pihak nga linya kag nasugata ang isa pa ka motorsiklo nga ginamaneho naman ni Xyril Dean Diestro nga taga Osita Subd. Koronadal City kag backrider sini nga si Christian Gonzaga Biadama nga taga banwa sang Sto. Niño, South Cotabato.
Bangud sa impact sang bangga-an, nag sustiner sang mga pilas sa nagkalain-lain nga bahin sang kalawasan ang mga biktima.
Madasig naman nga gindangat sang balay-bululngan ang mga biktima apang gindeklarar nga dead on arrival ang magpaka-isa nga Caballero.
Nagapadayon naman sa subong ang pagpaayo sang duha pa ka mga biktima sang aksidente.
