KORONADAL CITY – Nagahingyo ang tatay sang mag-utod nga napatay sa aksidente kagab-i sa national highway, Purok Ilang-Ilang, Barangay Saravia, Koronadal city nga kuntani mabuligan sila sang driver sa pagpalubong sa iya nga mga bata bangud pigado ang mga ini.
Suno kay Manong Jun Hilaria, indi man sila magpasaka sang kaso apisar nga tuman kasakit para sa ila pamilya ang natabo.
Ang mga kabataan sini nga napatay amo sanday Rhialyn Hilaria, 21-anyos kag Vivian Hilaria, 18-anyos nga napatay matapos araduhon sang pick-up nga ginapanag-iyahan sang BFAR XII ang ila ginasakyan nga Suzuki nga motorsiklo.
Nagapati si Manong Jun nga 100km per hour ang pagpadalagan sang driver sang salakyan bangud sa impact sang pag-arado sini sa motorsiklo sang iya mga bata kag sang isa pa nga napatay man sa aksidente.
Emosyonal man nga ginpakigbahin sini nga bangud ginakapoy na siya kagab-i, ginsugo niya ang iya mga bata sa pagbakal sang gasolina agud magamit sini pagkabuwas sa iya trabaho bilang manug-senso.
Halos gintakluban siya sang langit sang ginpahibalo angot sa aksidente kag sang ginkadtuan sini ang lugar nakita niya ang iya duha ka mga bata nga wala na sang kabuhi.
Mangin ang iya asawa ang indi maistorya tubtob subong bangud nagasigi na lamang sang hibi bangud sa kamatayon sang ila mga bata.
Mabudlay suno pa nga batunon ang natabo apang wala na sila sang may mahimo.
Nagalaum ang pamilya nga tungdan sang driver kag sang BFAR XII ang ila obligasyon agud mapalubong nila sang maayo ang duha.
Nagpanawagan man ini sa mga driver sang salakyan nga mangin mahalong sa pagmaneho agud indi na magluntad liwat ang aksidente kasubong sang natabo sa mga bata sini.
