Hugot nga ginakundena sang militar ang ginhimo sang mga New People’s Army nga pagpatay sa duha ka mga IPs sa Sultan Kudarat.
Kadungan sini,ginpasiguro sang militar nga nagapadayon ang ila nga paglagas sa mga katapu sang NPA nga nagpatay sa Indigenous Peoples Mandatory Representative (IPMR) kag myembro sang CAFGU Active Auxiliary (CAA) sa Sultan Kudarat.
Ginpahayag sa Bombo Radyo Koronadal ni Lt. Col. Roden Orbon nga ginakasubo sang pamunuan sang 6ID, Philippine Army ang pagpatay kina IPMR Emong Kantala, Datu sang Manobo Dulanga Tribe sa Senator Ninoy Aquino, Sultan Kudarat kag Danilo Englater, isang CAFGU sa Lebak Sultan Kudarat.
Suno pa kay Orbon, indi involbado sa military ukon law enforcement operations ang duha bangud nagapatigayon lamang sila sang information gathering sa tagsa nila ka mga lugar labi na sa mga problema kag mga issues nga ginapalab-ot sang mga tawo.
Dugang pa ni Orbon, lunsay mga inosente ang ginpatay sang mga rebelde agud nga ipakita nga may pwersa pa sila kag luyag nila nga e-terrorize ang mga pumulyo.
Dako man ang pagpati sang opisyal nga nakabatyag ang mga rebelde sang asod-asod nga military operations nga ginpatigayon sang militar kun diin sang nagligad nga bulan lamang napatay sa engkwentro ang isa ka maimpluwensiya nga lider sang mga ini.
Magluwas sini, madamo man nga mga NPA ang nagsungka kag nabalik sa sabak sang gobyerno.
Kaangot sini, padayon ang panawagan sang militar sa iban pa nga rebelde nga magsungka na agud nga makapangabuhi sang malinong kaupod ang tagsa nila ka pamilya.
Nagpanawagan man ini sa mga NPA nga indi na pag-dalahigon ang mga inosente nga sibilyan sa ila nga mga operasyon.
