Apisar nga wala pa nagasugod ang plano sa pagbaligya sang bugas sa P29 kada kilo, ginpahayag na sang Department of Agriculture (DA) sa mga konsyumer nga indi dapat abusuhon ang ini nga programa.
Ginhimo sang ahensya ang apela bangud ginalantaw na nila nga may posibilidad nga magbalik-balik ang mga konsyumer sa pagbakal sang mas barato nga bugas, bisan may limitasyon sa volume sang mahimo mabakal sang kada pamilya.
Suno kay DA Spokesperson Assistant Secretary Arnel de Mesa, ang target sang gobyerno amo ang pagbulig sa mga marginalize nga sector sa sini nga programa, amo nga kinahanglan maintindihan sang mga konsyumer nga limitado lang ang ila mabakal.
Pahanumdom sang opisyal sang DA sa mga konsyumer nga indi dapat pasobrahan ang ila bakal kag hatagan man sang ligwa ang iban nga kwalipikado man nga makabakal.
