KORONADAL CITY – Wala pa sang may namonitor nga lugar sa Soccsksargen Region nga ginbahaan kag naka-eksperiensiya sang landslide tuga sang pagbubo na sang ulan kada adlaw.
Ini ang ginpahayag ni Ms. Jorie Mae Balmediano, information officer sang Office of the Civil Defense (OCD) 12 sa interview sang Bombo Radyo Koronadal.
Apang, suno kay Balmediano padayon ang ila nga pagmonitor sa mga lugar nga delikado sa baha kag landslide labi na nga ginapaabot na ang pag-igo sang La Nina Phenomenon.
Pila sa mga lugar nga gintumod sini nga prone sa flash flood kag landslides amo ang mga masunod mga banwa sang Bagumbayan, Esperanza, Isulan, Lebak kag Palimbang sa Sultan Kudarat.
Samtang, mga banwa naman sang Tupi, Polomolok, Surallah, Sto Nino, Norala, Banga kag siyudad sang Koroandal sa probinsiya sang South Cotabato.
Dugang pa diri ang mga banwa sang Makilala, Alamada, Aleosan kag siyudad sang Kidapawan sa bahin sang Cotabato Province.
Samtang, mga lugar naman sang Gensan, Alabel, Malungon kag Glan subong man mga coastal areas ang ginabantayan sa probinsiya sang Saranggani.
Kaangot sini, padayon ang pagpahanumdom sang OCD-12 sa mga lugar nga delikado sa kalamidad subong nga tig-ululan nga mangin vigilante kag mag-alerto sa tanan nga tion agud mangin luwas.
